Kók og kjánahrollur

Ég er ein af þeim sem er alls ekki sátt við þessar hallærislegu Kók Zero auglýsingar. Svo fullar af mannfyrirlitningu, ekki aðeins gagnvart konum heldur líka körlum. Ég trúi því ekki að margir karlar vilja vera álitnir svona grunnir í huganum.
Ósvífni kók er jafnvel svo mikil að þeir leyfa sér að segja að verið sé að auglýsa til karlmanna sem markhóps sem jafngildir að "við höfum nú ekki meira álit á ykkur en þetta"
En alla vega þá hafa þessar auglýsingar komið mér ágætlega, já eiginlega breytt lífstíl mínum. Ég er nefnilega næstum hætt að drekka gos. Ég var ein af þeim sem drakk 2-4 lítra af kóki á viku, en eftir Zero herferðina hef ég ekki fengið það af mér að kaupa kók. Ég vil ekki styrkja fyrirtæki sem leyfir sér svona framkomu gagnvart viðskiptavinum sínum og sér ekki sóma sinn í að draga þetta til baka þrátt fyrir ítrekaðar ábendingar.
Mér finnst Pepsi hins vegar vont, svo að ég sleppti því oftast að kaupa nokkuð gos. Enn kaupi ég mér stöku dós inná Hlemmi á leið í vinnu en það er allt og sumt.
Ég ætti kannski að senda Vífilfell þakkarbréf? Nei ég held ekki, enda eru þeir enn að valda mér kjánhrolli í hvert sinn sem ég sé þennan aulaskap þeirra.

Athugasemdir

[Heiða Þórðar, 13.4.2007 kl. 22:23]

INNILEGA sammála. 1. verðlaun fyrir hallærisauglýsingu ársins!

[Júlíus Freyr Theodórsson (IP-tala skráð) 13.4.2007 kl. 22:35]

Hjartanlega sammála, ég að a.m.k. tel mig ekki þetta grunnhygginn.

[SigrúnSveitó, 14.4.2007 kl. 09:32]

Held ég verði að horfa á sjónvarp ef ég á að fatta hvað þið eruð að tala um.

En gott mál að hætta í kókinu, þetta er bölvað sull.  Ég var kókisti hér áður fyrr, svo hætti ég að borða sykur, þegar ég byrjaði aftur 18 mánuðum síðar hlakkaði ég geðveikt til að fá mér KÓK!!  En viti menn, mér fannst það bara vont og hef ekki séð ástæðu til að drekka það síðan.  Sem mér finnst bara frábært.

Knús til þín Thelma. 

[Jónína Sólborg Þórisdóttir, 14.4.2007 kl. 10:27]

Langt síðan ég hætti að drekka kók (og bara allt gos), horfi sjaldan á sjónvarp þannig að ég hef bara heyrt talað um þessar auglýsingar... ég sé að ég má vera fegin því.

[Jens Guð, 14.4.2007 kl. 18:17]

  Ég horfi ekki á sjónvarp en hef séð þessar auglýsingar í prentmiðlum.  Svo ótrúlega hallærislegar og lágkúrulegar að ég hef sett viðskiptabann á Vífilfell.  Kaupi engar vörur frá því fyrirtæki.  Hvorki gosdrykki,  Provamel sojadrykk,  Nestea,   Brazza ávaxtasafa, Hi-C,  Svala,  Trópí,  Carlsberg bjór,  Jakobsen bjór né Beep ávaxtaáfengisdrykk.

  Ekki nóg með það heldur átti ég Soda Stream tæki.  Ég henti því. 

  Það sem er verra er að auglýsingarnar virka á 12 - 13 ára stráka og óþroskaða eldri stráka. 

[Brynja Hjaltadóttir, 14.4.2007 kl. 18:56]

Mjög asnalegar auglýsingar. Svo asnalegar að auglýsingastofan sem bjó þær til ætti að loka...og skammast sín.

[linda (IP-tala skráð) 14.4.2007 kl. 21:55]

Talandi um hallærislegar auglýsingar þá er Dressman toppurinn á því. Að vísu er ekki hægt að saka þá auglýsendur um mannfyrirlitningu ... ja nema ef menn almennt séu gróflega móðgaðir yfir þeirri steríótýpu sem er varpað fram af flottum karlmanni.  Ég hef aldrei vitað hvort þessar auglýsingar séu meintar sem grín eða alvara en ég bara má ekki missa af neinni... og ekki börnin mín heldur.

[Jens Guð, 14.4.2007 kl. 22:33]

Vífilfell er með eigin auglýsingastofu.  Strákurinn sem er þar í forsvari segir að auglýsingaherferðin sé hönnuð á hinum Norðurlöndunum.  Það er lygi.  Jú,  grunnhugmyndin um zero hitt og þetta er notuð á Norðurlöndunum.  En ég hef ekki orðið var við þessar asnalegu kynferðislegu tilvísanir í auglýsingunum úti.

Auglýsingar Vífilfells á Beep ávaxtaáfengisdrykknum eru í sama lágkúrulega dúrnum.  Markaðsstjóri Vífilfells virðist vera einstaklega óþroskaður og ófrumlegur.  Ég ríf alltaf Beep auglýsingarnar niður þegar ég sé þær á veitingastöðum og þurrka af skónum mínum á þeim. 

[Sædís Ósk Harðardóttir, 15.4.2007 kl. 22:19]

Sem betur fer er ég pepsifan, drekk bara pepsi max, finnst þessar auglýsingar fáranlegar hjá þeim og finnst þeir ættu að sjá sóma sinn i því að hætta að birta þær.

[Dísa (IP-tala skráð) 16.4.2007 kl. 09:33]

Hér á bæ eru meira að segja kókistarnir að mestu hættir að drekka kók og spila þessar auglýsingar sinn góða skerf í því.  Held að zero hljóti að verða zero vinsælt vegna þessara auglýsinga og sennilegt að það hverfi af markaði fljótlega spái ég.