Krúttlegast í heimi

Gleðilegt Sumar!!!
Ég er búin að vera í heimsókn hjá mömmu, Íris systur og Patreki Kára, litla frænda síðan á miðvikudagskvöld. Dásamlegt að vera hér í sveitasælunni á Eyrarbakka í kyrrð og ró. Eins og venjulega þá er ég búin að sofa eins og sleggja hér, það er bara eins og ég missi alltaf meðvitund þegar ég kem hingað. Ég veit ekki hvort það er vegna kyrrðarinnar eða af því ég er komin til mömmu :) Mér er eiginlega alveg sama af hverju það er, þetta er bara yndislegt.
Íris systir er orðin dagmamma hér á Eyrarbakka og í gær fylltist húsið af litlum krílum. Ég fékk að fylgjast með allan daginn og það var frábært. Það er endalaust krúttlegt að fylgjast með litlum börnum bauka við lífið sitt. Hvert með sinn persónuleika og sinn áhuga og sínar aðferðir. Íris er frábær dagmamma, algjörlega fædd til að vera umkringd börnum og greinilegt að litlu krílunum líður vel hjá henni.
Mér fannst æðislegt að fá að fylgjast með þeim í einn dag og taka þátt.
Eins og víðar virðist vera skortur á plássum í barnagæslu og það var fljótt að fyllast hjá Íris, þó losna aftur hjá henni tvö pláss eftir mánuð þar sem tvö af krílunum komast að á leikskóla staðarins. Íris sagði mér að sveitafélagið borgi 30.000 með hverju barni svo foreldrarnir þurfi að borga minna fyrir gæsluna. Ég fór að hugsa hvort það væru ekki margir foreldrar sem myndu kjósa að vera heima lengur með börnunum sínum. 30.000 er kannski engin gífurleg upphæð en gæti samt gert gæfumuninn á mörgum heimilum. Af hverju ætli það sé ekki í boði að fólk fái þennan pening bara beint með barninu inn á eigið heimili til að foreldrar geti verið meira heima með sínum krílum?
Ég var svo heppin að það var mögulegt fyri mig að vera meira og minna heima með syni mínum í rúmlega tvö ár og svo gat ég leyft mér að vinna hálfan daginn í nokkur ár í viðbót. Vá hvað mér þótti það dýrmætt. En þetta var aðeins mögulegt af því þáverandi maðurinn minn var með nógu góðar tekjur fyrir okkur öll ef við lifðum sparlega, sem við gerðum.
Ég er algjörlega viss um að fleiri foreldrar myndu óska þess að þetta væri mögulegt og kannski gæti þessi 30.000 kall verið akkúrat sú upphæð sem brúaði bilið hjá mörgum. Það væri alla vega þess virði að reyna það.

Athugasemdir

[Sigríður Guðnadóttir, 26.4.2008 kl. 15:01]

Góð uppástunga !!!!  sorglegt hvað margir foreldrar missa mikinn tíma með litlu krílunum sínum   vona að þú farir bara á þing mín kæra

bestu kveðjur

[SigrúnSveitó, 26.4.2008 kl. 17:44]

Ég held það sé í Noregi sem þetta er einmitt raunveruleiki, foreldrar fá einhverja vissa upphæð ef börnin eru heima.  Mjög sniðugst og ekki spurning að einhverjir myndu grípa tækifærið fegins hendi.
Ég var heima í ár með báða strákana og var engan vegin tilbúin að skila þeim af mér...en það var bara þannig.  Hins vegar höfum við verið svo lánsöm að geta haft ákveðið frjálsræði í þessu svo öll börnin hafa átt MARGA frídaga frá leikskóla...

Nóg í bili...smá munnræpa hér...   Hlakka til þegar þú ferð á flakk hingað uppeftir

Knús, S. 

[Helga , 26.4.2008 kl. 21:40]

Já það væri frábært ef foreldrar fengu þetta val, þ.e.a.s. fá peninginn eða fá sér dagmóður.  Held að þetta sé á stefnuskrá bæði hjá Hafnarfirði og Reykjavík .......en hvað það verður lengi þar er nú spurning?  Af reynslunni verður það ábyggilega nokkuð lengi.  Svo hef ég heyrt að Garðabær borgi foreldrum þessa upphæð fyrir að vera heima.......en veit ekki hvort að það sé rétt?

kveðja

Helga Hrönn

[Dísa Dóra, 26.4.2008 kl. 22:14]

Gleðilegt sumar skvís og takk fyrir veturinn.

Hef sjálf hugsað um að ég vildi alveg fá þennan pening bara til að auðvelda mér að vera bara meira heima með litla krúttinu mínu.  Vonandi eitthvað sem framtíðinn ber í faðmi sér. 

[Monopoly (IP-tala skráð) 27.4.2008 kl. 11:10]

Hafið þið komið til Bretlands nýlega? Það eru börnin heima fram til 3ja ára aldurs því dagheimilispláss á einkareknu dagheimili kostar um 100.000 á  mánuði. Fátækt meðal einstæðra mæðra er einna mest þar í allri Evrópu, menntun kvenna mun minni en annars staðar í Vestur Evrópu og andlegt og líkamlegt atgerfi barna þannig að í óefni stefnir. Og þar eru nú allar mæður heima, fá einmitt einhvern 30.000 kall til að "tóra" út mánuðinn. Rætt um hversu mikil fátæktargildra felst í kerfinu.

[Grumpa, 27.4.2008 kl. 14:11]

hefur einhver heyrt minnst á félagslega einangrun?

[Thelma Ásdísardóttir, 28.4.2008 kl. 17:54]

Monpoly, ég er nokkuð viss um að fátækt og skortur á menntun kvenna í Bretlandi á ekki rætur sínar að rekja til þess að foreldrar séu hvattir til að vera heima með börnum sínum með því að borga með þeim einhvern 30.000 kall. Ég held að það þyrfti að skoða málið í meiri heild, enda hefur þetta virkað ágætlega í öðrum löndum eins og Noregi og víðar.

Grumpa, börn verða ekki félagslega einangruð þó þau hafi kost á að vera meira með foreldrum sínum en gengur og gerist í dag. Það má alveg fara einhvern milliveg.

Sumarkveðja :)

[Linda litla, 29.4.2008 kl. 09:50]

Ég hef fengið að vera með syni mínum heima nánast síðan hann fæddist þar sem að ég er öryrki, og ég er þakklát fyrir þennan tíma sem að við höfum átt. En aftur á móti þrái ég ekkert heitar núna en að fara út á vinnumarkaðinn, ég vildi óska þess að ég hefði heilsu í það.

Eigðu góðan dag Thelma.

[Ruth Ásdísardóttir, 9.5.2008 kl. 21:27]

Hæ elsku Thelma. Þú hefur verið klukkuð af mér þannig að þú átt að skrifa niður 7 atriði sem þú ert þakklát fyrir og klukka síðan fimm aðra. :) Sé þig á sunnudaginn!